Puisi Sunda

ieu teh mangrupakeun sababaraha syair sastra sunda , , lamun ditilik hiji hiji eusina mangrupikeun hiji leunyeupaneun pikeun urang sarerea, waas, mangga saderek sadaya anu rumaos urang sunda mugi mugi mangpaat, hatur nubun, wilujeung

KAMANA ANGIN PRIANGAN ???

seungit angin priangan, ngusapan embun-embunan
hawar-hawar rerendahan ngahariring ayun ambing
seungit angin kayangan, sumerep na lelembutan
hawar-hawar rerendahan ngahariring éling-éling mangka éling

waas éta tembang
kamari katineungkeun kénéh
dihariringkeun disisi huma, mumunggang Cikuray lebah handap
dipirig haliwir angin, digupay dangdaunan
dialokan ricit piit
mangsana patani ngaguar leuweung pihumaeun
ngagecruk pacul mapag taneuh beureum
malikkeun kanyaah ka lembur pamatuhan
lembur tempat kuring digubragkeun ka alam dunya
lembur tempat kuring digedekeun di pangulinan
lembur tempat kuring tatapa nyiar pangarti
maguran di padepokan jati Sunda

waas eta tembang
harita dihaleuangkeun
dipiring jentreng kacapi, jeung gelikna suling
mapag usum ngijih, rek tebar binih
dangdaunan nu maruragan kokoleangan
nambah sarina kanyaah ka mangsa lawas
mangsana panceg jungkiringnya Pajajaran
mangsana seungit nyambuangna Siliwangi
kakoncara ka sakabeh Nusantara
pamolahna ki Sunda harita
dina Palagan Bubat
ciri siloka urang Sunda nu digjaya
najan nepi kamana, ka waktu iraha
moal leungit
moal musnah
asal aya nu mikanyaah

waas eta tembang
ayeuna tinggal panineungan
geus leungit silokana
tinggal waasna wungkul
catetan nu aya tinggal jungkiringna
kasilih ku rohakana caah modernisasi
runggunuk huma geus teu mangrupa
ledokna pasawahan geus luntur warnana
seungit tatangkalan geus murag sarina
kasilih … kaganti
lalaunan … najan samar-samar
leungit … kasapu haliwir angin globalisasi

najan kitu
kumaha urang
nyaah atawa tega
miara atawa palastra
jati Sunda
jati urang sarerea



GERENTES NU NGANGRES

Gulidag rasa bet tuluy ngamuara jeroeun dada
Sedengkeun tanggul cimata karasa rek bengkah nangtang ca’ah nu rongkah
Sawirahma jeung ratugna dulag na jajantung
Kapireng galindeng takbir nu antare ngagerihan pikir

Nyanggakeun sadaya-daya…
Rumasa jadi jalma loba katuna
Palidkeun kuring di lautan hampura Anjeun, Yaa..Robbanaa…
Malar Rohmat Anjeun cindek tur lana.

Alloohu Akbar..
Walillaahilhamd..


Sabda Sunda

Ku: Sanghyang Mughni Pancaniti

Sunda moal leungit ku ganti wanci
Sunda moal laas ku robah mangsa
Sunda moal luntur ku kurunyung taun
Sunda moal helas ku ilang bulan

Sunda geus ngancik dina ati
Sunda geus nyayang dina dada
Sunda Geus kaukir dina fikir
Sunda geus manunggal dina rasa

Brah lumampah.. migawe sunda nu nyata
jung lumaku.. migawe sunda nu luhung
jig geura indit.. migawe sunda nu sajati
Tanda syukur ka Gusti nu Maha Suci

Dimana geus eling kitu.
Rek ka wetan, Prak..!
Rek ka kidul, jug..!
Rek ka kaler, perk..!
Rek ka kulon, los..!


RUMINGKANG

ku : Bunga Dessri Nur Ghaliyah

ari diri keur nyorang…

pikiran sok ngawang-ngawang…

hate hariwang

paanggang

lamun emutan beurat…

kadang sok hayang ngadat

kapeurih ngagedat

ngolebat…

kasuat-suat…

aya anggang dina raga…

katresna dina dada…

kingkin dina jiwa…

kamana kudu diteang?

na kamana kuring kudu datang?

anjeunna geus miang…

raga jadi anggang…

tapi…

tapi ati tetep raket

hate deukeut…

geugeut…

meumeut…

lain waktuna kesel…

geus lain usumna sebel…

ngado’a…

menta kanu maha kawasa…

mapalerkeun jiwa…

nenangkeun raga

matak tiis dina dada…

yakin da Gusti mah moal mirosea…

mikanyaah balarea…

kaasup anjeunna nu aya di alam baka…

tangtu rahmatna bakal dibuka…

amin…


Sumirat Cahya Dina Wewengkon Sukma

Gung Degung Ngadegna Hyang Agung
Mapag kidung….. Cianjuran ciri anu ngajurung pangabdian
Patarema jeung gelik suling nu ngajak diri…Nyumurup nyumerepkeun ka eling
Ka Gusti Nu Maha Suci
Pamuntangan diri pikeun sakumna pangabdi
Hayu mulang kana ka sajatian
Jati nu mawa kawalagrian
Jati nu mawa kasampurnaan
Jati nu baris mayungan ku kasalametan
Asyhadu anlaa ila ha ilalloh wa asyhadu anna Muhammadarosulluloh
Teu daya teu upaya anging gusti Nu Maha Kawasa